Samband stjörnuparsins Gwen Stefani og Blakes Sheltons er sagt vera á þunnum ís eftir að þau fluttu af búgarðinum í Oklahoma til Encino í Los Angeles.
„Þeim líður eins og þau séu að kafna og þau eru stressuð. Þau eru bæði komin að þolmörkunum,“ sagði heimildarmaður Us Weekly um málið. Rót vandans liggur í öllu því sem fylgir flutningunum.
Í maí síðastliðnum keyptu þau flennistórt hús í Encino-hverfi í útjaðri Los Angeles og hafa flutningarnir tekið mikið á. „Vinir þeirra segja að flutningarnir hafi breyst í martröð. Þetta er án efa eitt erfiðasta tímabilið sem þau hafa gengið í gegnum saman,“ sagði heimildarmaðurinn.
Það er þó enn von fyrir Stefani og Shelton sem höfðu ráðgert að ganga í það heilaga í Los Angeles í haust. „Þau kunna að miðla málum og hafa komist í gegnum erfið tímabil með því að horfa á heildarmyndina,“ sagði heimildarmaðurinn.