Stjörnuspekingurinn Jackie Stallone, móðir Hollywoodleikarans Sylvester Stallone, er látin 98 ára að aldri.
Stallone lést í svefni líkt og hún hafði óskað sér að sögn yngsta sonar hennar, Franks. Frank Stallone minntist móður sinnar í færslu á Instagram í gærkvöldi. „Það var erfitt að líka illa við hana, hún var mjög einstök manneskja,“ sagði Frank um móður sína.
Stallone var fædd 29. nóvember árið 1921. Hún stalst að heiman fimmtán ára gömul frá heimili sínu í Washington D.C. í Bandaríkjunum og gekk í sirkus.
„Faðir minn, sem var vellauðugur lögmaður, vildi að ég færi í lögfræðina, en mig langaði að vera á sviðinu,“ sagði Stallone í viðtali við The Times árið 2005.
Stallone giftist sínum fyrsta eiginmanni, Frank Stallone eldri, hárgreiðslumanni og leikara í hjáverkum, árið 1945. Þau voru gift í 12 ár og áttu saman leikarann Sylvester og tónlistarmanninn Frank.
Hún eignaðist eina dóttur, Toni D'Alto, með öðrum eiginmanni sínum, Anthony Filiti. Hún lést úr lungnakrabbameini árið 2012, þá 48 ára gömul.
Stallone kom víða við á ferli sínum en hún opnaði meðal annars líkamsrækt fyrir konur á 6. áratugnum og hélt úti líkamsræktarþáttum. Hún varð ekki þekkt nafn fyrr en á 10. áratug síðustu aldar þegar hún gaf út bók um stjörnuspeki. Hún varð gríðarlega vinsæll stjörnuspekingur og spákona í kjölfarið.
Hún giftist þriðja eiginmanni sínum, Stepgen Devine, árið 1998 en þau bjuggu ekki saman meirihluta hjónabands síns.
View this post on InstagramA post shared by Frank Stallone (@frank.stallone) on Sep 21, 2020 at 9:22pm PDT