Breska rokksveitin Skunk Anansie hefur fært tónleika sína fram í júní á næsta ári. Hljómsveitin hugðist heimsækja Ísland í október og halda tónleika í Laugardalshöll á 25 ára afmælisári sínu, en liðsmenn Skunk Anansie hafa beðið eftir rétta tækifærinu til að heimsækja Ísland aftur.
Í ljósi samkomutakmarkana og mikillar óvissu næstu mánuði vegna COVID-19 hefur sú ákvörðun verið tekin að færa tónleikana til laugardagsins 5. júní.
Sveitin var stofnuð árið 1994 og naut mikilla vinsælda á tíunda áratugnum og lék meðal annars fyrir troðfullri Laugardalshöll 5. september 1997.
Skunk Anansie var starfandi til ársins 2001, er hljómsveitin tók sér hlé frá samstarfi allt þar til árið 2009.