Lagahöfundurinn Mac Davis er látinn 78 ára að aldri. Hann samdi meðal annars lagið In The Ghetto sem rokkkóngurinn Elvis Presley gerði frægt.
Davis lést í gær, þriðjudag, en hann gekkst nýlega undir hjartaaðgerð. „Mac Davis er búinn að vera skjólstæðingur minn í yfir 40 ár, en fyrst og fremst hefur hann verið minn besti vinur,“ skrifaði umboðsmaður hans, Jim Morey, í færslu á Facebook.
Davis samdi einnig lagið A Little Less Conversation fyrir Presley og var með sinn eigin sjónvarpsþátt á 8. áratug síðustu aldar. Hann kom einnig fram í þáttum á borð við Fargo og Murder She Wrote.