Joshua Tree valin besta plata 9. áratugarins

Joshua Tree, plata írsku hljómsveitarinnar U2, var valin besta plata 9. áratugarins af hlustendum BBC Radio 2. Platan kom út árið 1987 og á henni má finna slagara á borð við With or Without You og Where The Streets Have No Name. 

Á eftir Joshua Trree kemur plata Dire Straits, Brothers In Arms, og í þriðja sæti er The Stone Roses. Plata Dire Straits var mest selda platan í Bretlandi á 9. áratugnum. 

Í efstu 20 sætunum á listanum er aðeins að finna plötur eftir karlmenn, fyrir utan plötu Kate Bush, Hounds Of Love, sem er í 11. sæti. Á plötu The Human League, Dare, má þó finna lög með gestasöngkonunum Joanne Catherall og Susan Ann Sulley. 

Plötur söngkvennanna Madonnu, Janet Jackson, Tracy Chapman og Grace Jones er að finna neðar á listanum. 

„Við höfum fengið að njóta þeirra forréttinda að spila Joshua Tree á tónleikum um allan heim á síðustu árum og mér líður eins og platan hafi náð heilum hring. Það gleður okkur mikið að fólk tengi enn við þessi lög, nótt eftir nótt, ár eftir ár,“ sagði gítarleikarinn The Edge í viðtali við BBC. 

Efstu 10 sætin á lista BBC Radio 2

1. U2 – Joshua Tree
2. Dire Straits – Brothers in Arms
3. The Stone Roses – The Stone Roses
4. Michael Jackson – Thriller
5. Guns N' Roses – Appetite For Destruction
6. The Human League – Dare
7. The Smiths – The Queen is Dead
8. Paul Simon – Graceland
9. ABC – Lexicon of Love
10. Prince – Purple Rain

• Blogga um frétt