Tónlistarfólkið Adele og Skepta er sagt vera búið að færa samband sitt upp á næsta stig. Rúmt ár er síðan fyrst fór að kvisast út að þau væru í sambandi. Nú segja sögurnar að þau séu aðeins meira en bara vinir.
Heimildarmaður People segir að það „sé farið að hitna í kolunum“ hjá þeim tveimur. „Þau eru í sömu vinahópunum í London og hún skemmtir sér vel,“ sagði heimildarmaðurinn.
Adele og Skepta eru sögð ná einstaklega vel saman en þau eiga ekki bara tónlistina sameiginlega. Þau eru bæði frá Tottenham í London og eiga bæði ung börn.
Adele sótti um skilnað við eiginmann sinn Simon Konecki í september í fyrra en þau höfðu verið gift í sjö ár. Þau eiga saman soninn Angelo sem er átta ára.