Nýjasta þáttaröðin af Krúnunni kemur á Netflix um helgina og er þáttur Díönu prinsessu stór í þáttaröðinni. Leikkonan Emma Corrrin fer með hlutverk Díönu en hún vildi leggja sérstaklega mikla áherslu á að sýna glímu Díönu við lotugræðgi.
Corrin segir að þau hafi beðið handritshöfundana að skrifa lotugræðgina betur inn í handritið.
„Mér leið eins og ef við ættum að reyna að lýsa lotugræðgi á heiðarlegan hátt þyrftum við að sýna hana í raun og veru, annars væri það vanvirðing við fólk sem hefur gengið í gegnum þetta,“ sagði leikkonan í útvarpsviðtali að því er fram kemur á vef People. „Mér finnst við ekki eiga að forðast þessa umræðu. Díana var mjög heiðarleg um reynslu sína af lotugræðgi og ég dái það.“
Í nýlegu viðtali við Variety sagði Corrin að það væri erfitt að gefa rétta mynd af Díönu án þess að sýna lotugræðgina sem hún glímdi við.