Bandaríska tímaritið Forbes tekur saman tekjuhæstu stjörnurnar á hverju ári. Á hverju ári tekur það einnig saman tekjuhæstu stjörnurnar sem eru látnar. Á toppnum trónir Michael Jackson sem hagnaðist um 48 milljónir bandaríkjadala frá október 2019 fram í október 2020, eða um 6,5 milljarða íslenskra króna.
Næsttekjuhæsta stjarnan sem fallin er frá er dr. Seuss sem lést árið 1991. Dánarbú hans skilaði 33 milljónum bandaríkjadala í kassann. Yfir sex milljónir eintaka af bókum hans seldust í Bandaríkjunum á síðasta ári.
Þriðji tekjuhæsti er Charles Schulz, höfundur Charlie Brown, Snoopy og fleiri. Tekjur dánarbús hans voru 32,5 milljónir á síðasta ári. Hluta þess má rekja til þess að Apple TV+ sýndi nýja seríu af Snoopy in Space á þessu ári.
Á listanum er að finna stjörnur á borð við Elvis Presley, John Lennon, Freddie Mercury og einnig Kobe Bryant sem lést sviplega í þyrluslysi á þessu ári.
Listi Forbes