Vatíkanið leitar nú svara hjá samfélagsmiðlinum Instagram um af hverju opinber aðgangur Frans páfa líkaði við bossamynd hjá brasílískri fyrirsætu.
Það komst í fréttirnar í vikunni þegar aðgangur páfans hafði af einhverjum ástæðum lækað mynd af fyrirsætunni Nataliu Garibotto. Lækið var enn sjáanlegt hinn 13. nóvember áður en það var tekið í burtu.
Lækið hefur vakið mikla kátínu og grínaðist Garibotto sjálf með að nú vissi hún allavega að hún kæmist til himna. Garibotto er með 2,4 milljónir fylgjenda á samfélagsmiðlinum.
Kaþólska fréttastofan Catholic News Agency segist hafa heimildir fyrir því að samskiptastofa Vatíkansins leiti nú skýringa á því af hverju myndin fékk læk frá páfanum. Heilt teymi stýrir samfélagsmiðlaaðgöngum páfans.
Páfinn er vinsæll á Instagram og er með 7,4 milljónir fylgjenda þar og 18,8 milljónir fylgjenda á Twitter.
Myndina sem páfinn lækaði, eða lækaði ekki, má sjá hér fyrir neðan.