Grammy-verðlaunahátíðinni hefur verið frestað fram í mars vegna útbreiðslu kórónuveirunnar. Hátíðin átti að fara fram 31. janúar en hin nýja dagsetning er 14. mars.
Fjöldi smita hefur aukist í Los Angeles í Kaliforníu í Bandaríkjunum, þar sem hátíðin mun fara fram.
„Það er ekkert mikilvægara en heilsa og öryggi þeirra sem eru í tónlistarsamfélaginu okkar og allra þeirra sem leggja hönd á plóg við að framleiða verðlaunahátíðina,“ segir í tilkynningu frá Recording Academy sem stendur fyrir verðlaunahátíðinni.
Önnur verðlaunahátíð, Screen Actors Guild Awards, á að fara fram sama kvöld og Grammy-verðlaunahátíðin 14. mars. Stjórnendur SAG-verðlaunahátíðarinnar hafa gagnrýnt val á dagsetningum og segjast hafa búist við meiri tillitsemi af hálfu Recording Academy.
Ráðgert var að verðlaunahátíðin myndi aðeins fara fram í útsendingu og að engir áhorfendur yrðu í salnum. Það á enn við en fleiri verðlaunahátíðir hafa verið haldnar með þessu sniði frá því í haust vegna kórónuveirunnar.
Fyrstu mánuðir ársins eru venju samkvæmt undirlagðir verðlaunahátíðum. Vegna kórónuveirunnar hefur flestum þeirra verið frestað fram á vorið í þeirri von að ástandið verði betra þá.