Tónlistarmaðurinn Sylvain Sylvain er látinn 69 ára að aldri. Sylvain var gítarleikari hljómsveitarinnar New York Dolls um árabil.
Eiginkona Sylvains, Wanda O'Kelley Mizrahi, greindi frá andláti hans í færslu á facebook en hann lést á miðvikudag.
Sylvain lést úr krabbameini sem hann hafði glímt við í tvö og hálft ár.
„Þótt hann hafi barist eins og hetja lést hann úr þessum sjúkdómi í gær. Við syrgjum hann og söknum hans, en vitum að núna hefur hann loksins fundið friðinn og finnur ekki lengur til,“ sagði Mizrahi í færslunni.
Hún bað fólk að spila tónlistina hans, kveikja á kerti og minnast hans.