Elísabet II. Bretlandsdrottning fær ekki að hitta eiginmann sinn Filippus prins sem dvelur nú á spítala. Strangar takmarkanir vegna kórónuveirunnar gilda um heimsóknir á spítalana þar ytra.
Prinsinn hefur verið á King Edwards VII.-spítalanum í London frá 16. febrúar vegna sýkingar en var færður á St Bartholomew-spítalann í gær þar sem verið er að fylgjast með hjartakvilla. Þetta kom fram í tilkynningu frá Buckingham-höll í gær.
Þetta er lengsta spítaladvöl prinsins en hann er 99 ára og hefur almennt verið við góða heilsu. Hann verður 100 ára í júní.
Drottningin mun ávarpa þjóðina á sunnudaginn næstkomandi í tilefni af breska samveldisdeginum (Commonwealth Day) og virðist sem þær áætlanir muni standast þrátt fyrir ástand prinsins.