Fatahönnuðurinn Mossimo Giannulli er laus úr fangelsi. Giannulli losnaði á föstudag og mun afplána restina af fangelsisdóm sínum á heimili sínu í Los Angeles.
Giannulli og eiginkona hans, Lori Loughlin, voru dæmd í fangelsi vegna aðkomu sinnar að háskólasvindlsmálinu svokallaða en þau greiddu hálfa milljón bandaríkjadala til að koma dætrum sínum tveimur inn í háskóla. Loughlin hefur nú þegar afplánað sinn dóm.
Giannulli var dæmdur í 5 mánaða fangelsi og hefði átt að losna þaðan 17. apríl.
Samkvæmt heimildum AP-fréttastofunnar þykir ekki óeðlilegt að Giannulli hafi losnað fyrr úr fangelsinu vegna þess hve stuttur dómur hans er og af hvaða eðli brot hans er.
Fangelsismálayfirvöld í Kaliforníu hafa í auknu mæli fært fanga úr fangelsum yfir í einangrun á heimili sínu, sérstaklega þegar ekki er um að ræða alvarleg brot. Er það meðal annars gert til að minnka áhættuna á kórónuveiruhópsýkingu innan fangelsanna.