Svona lítur Pete Doherty út í dag

Söngvarinn Pete Doherty úr Babyshambles varð heimsfrægur þegar hann byrjaði með ofurfyrirsætunni Kate Moss árið 2005. Sambandið entist ekki en hún ku hafa orðið þreytt á villtum lífsstíl hans. 

Doherty er nú 42 ára, býr í Frakklandi og segist stunda heilsusamlegri lifnaðarhætti. 

„Ég er að mestu edrú núna og vel oftar en ekki vatn umfram allt annað.“ Hann segist hafa fyllt út í kinnarnar með því að skipta út eiturlyfjum fyrir ost á ristað brauð. Þá leyfir hann sér að sofa.

„Árum saman vakti ég í fimm til sex daga og svaf svo í sólarhring. Nú elska ég að sofa. Í augnablikinu er ég nokkuð „hreinn“. Ég er hættur að taka heróín og ketamín,“ segir í umfjöllun The Sun.

Heimildarmenn segja að Doherty sé að ná betri tökum á lífinu í Frakklandi, fjarri skarkala borgarinnar. Hann býr þar ásamt kærustu sinni Katiu De Vidas. „Hann hefur aldrei verið hamingjusamari. Hann sinnir enn tónlistinni en þessi hægi lífsstíll í Frakklandi hefur góð áhrif á hann. Parið eyðir miklum tíma í að elda og fara út að ganga með hundinn.“