Hollywoodleikarinn Zac Efron er sagður hættur með hinni áströlsku kærustu sinni, fyrirsætunni Vanessu Valladares. Efron flutti til Ástralíu í kórónuveirufaraldrinum en hann kynntist Valladares síðasta sumar.
Það er ástralski miðillinn The Daily Telegraph sem greinir frá sambandsslitunum en ekki kemur fram hver ástæða þeirra er.
Stjarnan er sögð hafa kynnst Valladares síðasta sumar þar sem hún starfaði sem þjónn að því er fram kemur á vef Daily Mail. Valladares hefur verið í för með Efron síðustu mánuði en hann hefur bæði verið í tökum á bíómynd og heimildarþáttaröð í Ástralíu. Parið sást saman á flugvellinum í Sydney í lok mars. Síðast sást til þeirra saman 1. apríl.