Bandaríski leikarinn Ned Beatty lést á sunnudag, 83 ára að aldri.
Beatty var hvað þekktastur fyrir hlutverk sín í kvikmyndum á borð við Network, Superman og Toy Story 3. Hann var tilnefndur til Óskarsverðlauna fyrir besta leikara í aukahlutverki fyrir frammistöðu sína í Network.
Umboðsmaður Beatty, Deborah Miller, segir að Beatty hafi látist af náttúrulegum orsökum í faðmi fjölskyldu og annarra ástvina.
Beatty, sem var fæddur og uppalinn í Kentucky-ríki, steig fyrst fram á sjónarsviðið sem leikari í kvikmyndinni Deliverance árið 1972. Ferill Beatty spannaði rúma fjóra áratugi, en hann settist í helgan stein árið 2013.