Jói endurheimti bragðskynið með sterkustu pítsu Íslands

Jóhann Ásbjörnsson, Þórður Gunnarsson og Björn Teitsson
Jóhann Ásbjörnsson, Þórður Gunnarsson og Björn Teitsson Ljósmynd/Valur Þorsteinsson

Líklega sterkasta pítsa á Íslandi hefur nú verið sett saman af forkólfum Ég ann chili, þeim Birni Teitssyni og Þórði Gunnarssyni, í samstarfi við Shake&Pizza. Ég ann chili er  aðdáendaklúbbur íslenskra chiliunnenda.

Ég ann chili-pítsan er sett saman af virðingu við chilipiparinn

Það er óhætt að segja að pítsan sé einstök í sinni röð hérlendis. Carolina Reaper, grænn thai-chili og Naga Jolokia-pipar hljóma líklega framandi fyrir leikmanninn en um er að ræða heimsfrægar gæðachilipipartegundir sem chiliunnendur um allan heim þekkja. Einnig er notast við malaðan szechuan-pipar sem gefur pítsunni skemmtilegt „tvist“. Blaðamaður ræddi við þá Björn Teitsson og Þórð Gunnarsson sem stofnuðu Ég ann chili; aðdáendaklúbb íslenskra chiliunnenda og chilifíkla, árið 2013.

„Hugmyndin var frá upphafi að sýna hráefnum virðingu og nota aðeins það besta. Á sama tíma er ákveðin fagurfræði sem gildir um pítsur. Þær eiga ekki að vera of flóknar, einfaldleikinn á að ráða för,“ segir Björn Teitsson og tekur fram að markmiðið með pítsunni hafi verið að skapa vettvang fyrir umræður og ástaryfirlýsingar á hinum ýmsu afbrigðum chilipipars.

„Í samstarfinu við Shake&Pizza vildum við ná fram hinu klassíska sterkt-sætt „one-two-punch“ sem virkar mjög vel með chili. Það var á algjörum bannlista að svindla með nokkrum hætti, engri rótsterkri sósu blandað í pítsusósuna eða þvíumlíkt. Hér er eingöngu um alvöru, fersk hágæðahráefni að ræða,“ bætir Björn við.

„Sífellt fleiri eru að öðlast smekk fyrir sterkum mat á Íslandi og margir veitingastaðir með slíkt á sínum matseðlum. Fyrir okkur var mikilvægt að pítsan væri ekki bara sterk heldur líka gómsæt. Sterkur matur á ekki bara að búa til gufustrók út úr eyrunum, heldur er betra að nýta sterka bragðið til að upphefja réttinn og opna bragðlaukana,“ segir Þórður.

Chili eykur endorfín framleiðslu í heiladingli
Chili eykur endorfín framleiðslu í heiladingli Ljósmynd/Marcos Paulo

Ég ann chili-pítsan og chilisamfélagið styðja Krabbameinsfélagið

Björn Teitsson, annar stofnenda Ég ann chili-hópsins, starfar fyrir Krabbameinsfélagið og upp kom sú hugmynd að nýta nýju pítsuna til góðra verka. Það hefur lengi verið talið að neysla chilipipars geti haft ákveðið forvarnargildi gegn krabbameini þó að vissulega sé allt best í hófi. Við viljum því vekja athygli á þessum galdraáhrifum chilipiparsins með því að styrkja Krabbameinsfélagið,“ segir Björn. Allt söluandvirði Ég ann chili-pítsunnar fyrstu 10 dagana mun því renna óskert til Krabbameinsfélagsins, eða frá og með föstudeginum 25. júní út mánudaginn 5. júlí.

Chili er ávanabindandi, það vita þau sem vita

Ég ann chili-pítsan er fullkomin leið fyrir áhugasama til þess að kynnast töfrum alvöruchilipipars. Jóhannes Ásbjörnsson, Jói, einn af eigendum Shake&Pizza, reyndi það á eigin skinni við smökkun á nýju pítsunni. „Það sem ég komst að var að ég vissi nákvæmlega ekki neitt um chilipipar. Mín hugmynd var sú að sterkur chilipipar væri einhvers konar macho-pæling þar sem menn væru að kvelja sjálfa sig með karlmennskustælum eða kappátstilburðum. En chilipipar er bara allt annað en það. Hann snýst um fegurð og upplifun og gott bragð,“ segir Jói. „Svo má auðvitað bæta því við að ég missti allt bragðskyn eftir covid-sýkingu fyrr á árinu. Eftir að hafa smakkað þessa pítsu virðist það loksins hafa vaknað til lífsins á ný. Það eru heldur betur meðmæli.“

Ég ann chili pitsan inniheldur mörg mismunandi lög af hita, til þess að fá allt litrófið sem í boði er. Á henni eru pepperoni, ananas og rauðlaukur auk tveggja ferskra chili pipra, olíu úr þurrkuðum chili og szechuan pipars. Thai chili býr til bruna sem birtist strax á tungunni á meðan Carolina Reaper er ávaxtaríkur á bragðið til að byrja með en hitinn eykst stöðugt, svokallaður slow burner. Szechuan piparinn skapar ekki hita sem slíkur en býr til doða í munninum ásamt ákveðnu villtum og náttúrulegum seyðingi sem er alveg einstakur. Naga Jolokia olían er búin til úr þurrkuðum piprum sem færa pizzunni aukna dýpt, dass af reyktu bragði og aukinn hita og virkar í raun sem margföldunarvél á þann hita sem fersku piprarnir hafa þá þegar myndað. 

Carolina Reaper chili piparinn
Carolina Reaper chili piparinn Ljósmynd/Memhut Rozard

„Chili er ávanabinandi. Hann er endorfín- og adrenalínlosandi og skapar jafnvel hugbreytandi áhrif og mikla andlega vellíðan. Bruninn venst og skapar hugrenningatengsl við þessa vellíðan. Ég ann chili-pítsan er fyrir lengra komna, en allir ættu að prófa. Hún er fyrir allt fólk sem elskar sterkan mat, fyrir allt fólk sem ber virðingu fyrir sterkum mat og elskar fersk og góð hráefni. Hún er bragðgóð, hún er endorfínsprengja og hún er til þess að njóta. Verði ykkur að góðu og til hamingju íslenskt chilisamfélag,“ bætir Björn við að lokum.

mbl.is

Stjörnuspá »

Hrútur

Sign icon Þekking er voldugt afl og þú þarft að nýta þekkingu þína betur en þú hefur gert hingað til. Reyndu að komast hjá rifrildi því þetta er ekki góður dagur til slíks.

Stjörnuspá »

Hrútur

Sign icon Þekking er voldugt afl og þú þarft að nýta þekkingu þína betur en þú hefur gert hingað til. Reyndu að komast hjá rifrildi því þetta er ekki góður dagur til slíks.