Siggi Gunnars, útvarps- og tónlistarstjóri K100, hefur verið í fjölmiðlabransanum ansi lengi þrátt fyrir ungan aldur. 12 ára stofnaði Siggi sína fyrstu útvarpsstöð eftir stífar æfingar heima fyrir og var það útvarpsstöðin Jólahjól 104,9. Siggi er mikið jólabarn og tókst honum þarna að sameina tvær ástríður. 20 árum síðar er Siggi ennþá í útvarpi af fullum krafti og fer ástríðan ekki minnkandi.
Út frá útvarpsstöðinni Jólahjól fékk Siggi svo þætti á „lókal“ útvarpsstöð fyrir norðan en Siggi er alinn upp á Akureyri. Hann útskrifaðist úr VMA og fór þaðan í fjölmiðlafræði en ásamt náminu var hann alltaf á hliðarlínunni í útvarpi fyrir stöðvar eins og N4 og Kanann á sínum tíma. „Því hef ég alltaf verið viðloðandi fjölmiðla, síðan ég var 12 ára!“
Sigurður Þorri Gunnarsson er með mastersgráðu í útvarpsfræðum og vinnur sem útvarps- og tónlistarstjóri hjá K100. Ásamt því að hækka daglega í gleðinni kennir Siggi svokallaða partíspinningtíma, starfar sem skemmtikraftur og lýsir sjálfum sér sem lífsglöðum tilfinningabolta með utanáliggjandi taugakerfi.
Siggi kom í viðtal til Dóru Júlíu í Dagmálum. Þau ræddu um útvarpsstarfið, hvenær ástríðan fyrir útvarpinu kviknaði og hvernig það þróaðist svo í að hann yrði útvarpsstjóri á einni stærstu útvarpsstöð landsins, lífið og tilveruna, lífsgleðina og margt fleira skemmtilegt.
Dagmálaþættirnir eru opnir áskrifendum Morgunblaðsins. Viðtalið er að finna hér en einnig er hægt að kaupa vikupassa hér.