Harry Hamlin, faðir fyrirsætunnar Ameliu Hamlin, segir að það sem fari mest í taugarnar á honum varðandi samband dóttur hans við raunveruleikastjörnuna Scott Disick sé aldursmunurinn.
Átján árum munar á hinni ungu Hamlin og Disick en foreldrar hennar hafa bæði rætt sambandið opinberlega í þáttunum The Real Housewives of Beverly Hills.
„Það sem hefur farið í taugarnar á mér lengst er þessi aldursmunur, sem er skrítið fyrir mig,“ sagði Harry Hamlin. Hann hefur verið kvæntur Lisu Rinnu í yfir 20 ár og eiga þau saman dæturnar Ameliu og Deliluh. Fyrir það var hann í sambandi með Ursulu Andress og eignuðust þau soninn Dimitri saman.
„Ég var 14 árum yngri en hún þegar við áttum Dimitri. Svo ég get ekki kvartað er það?“
Rinna hefur líka tjáð sig um samband dótturinnar og segist hafa haft miklar áhyggjur þegar hún heyrði af sambandinu fyrst.