Heimili Brians May, gítarleikara rokkhljómsveitarinnar Queen, varð fyrir miklu vatnstjóni í kjölfar mikils úrhellis í Lundúnum síðustu daga. Flætt hefur upp úr niðurföllum og skólpkerfi borgarinnar.
Gítarleikarinn birti myndir og myndband á samfélagsmiðlinum Instagram sem sýnir hvernig heimili hans í Kensington-hverfi í Lundúnum liggur undir skemmdum. May skrifar texta með færsluna þar sem hann sendir Konunglega hverfaráðinu í Kensington og Chelsea kaldar kveðjur.
„Þetta er viðbjóðslegt og mikið tilfinningalegt áfall. Okkur líður eins og það hafi verið gerð innrás og heimilið okkar afmáð. Í kjallaranum geymdi konan mín ýmsa hluti sem skipta okkar minningar miklu máli og nýverið hafði ég sett barnamyndir þangað niður. Þetta er allt ónýtt.“