Tónleikar brit-rokksveitarinnar Skunk Anansie sem fram eiga að fara í Laugardalshöll í nóvember næstkomandi hafa verið færðir fram í apríl 2022. Sveitin hefur tvisvar áður þurft að fresta tónleikum sínum hér á landi, sem eru hluti af tónleikaverðalagi sveitarinnar um Evrópu, vegna kórónuveirunnar.
Tónleikarnir eru í þetta sinn þó ekki færðir vegna veirunnar, heldur vegna þess að söngkona sveitarinnar, Skin, á von á sínu fyrsta barni með eiginkonu sinni Rayne Baron.
Fram kemur í tilkynningu frá Nordic Live Event að miðahafar eru hvattir til að halda miðum sínum fyrir nýja dagsetningu og styðja þannig við viðburðahald á Íslandi. Miðarnir gilda sjálfkrafa áfram á nýrri dagsetningu og ekkert þarf að aðhafast.
Ef ný dagsetning hentar ekki geta miðahafar óskað eftir endurgreiðslu.