Gengur á ný eftir slysið í Kongó

Leikkonan Ashley Judd er farin að ganga á ný fimm mánuðum eftir að hún mölbraut á sér fótlegginn djúpt inni í regnskógi Kongós. 

Judd birti myndband af sér að ganga í þjóðgarði í Sviss þar sem hún fagnaði árangrinum. „Í dag, fimm mánuðum og þremur vikum eftir slysið í Kongó, gekk ég aftur og gott betur,“ skrifaði Judd við myndbandið. 

Beinbrot Judd var gríðarlega slæmt og ekki útséð um hvort hún myndi halda fætinum eða ekki. Hún féll um stóran trjádrumb inni í skóginum og brotnaði á fjórum stöðum. Það tók 55 tíma að koma henni á spítala og í aðgerð. 

Hún lýsir því að læknar hafi haft áhyggjur af því að hún myndi hljóta varanlegan taugaskaða. Þá voru bestu spár þeirra að hún myndi byrja að hreyfa fótinn ári eftir slysið. 

„Fóturinn verður aldrei eins. Þetta er nýr fótur og ég elska hann. Við erum vinir. Við höfum unnið þrekvirki og við eigum magnað líf fram undan,“ sagði Judd. 

• Blogga um frétt