Grínistinn Kathy Griffin greindi frá því á dögunum að hún hefði greinst með lungnakrabbamein. Hin sextuga Griffin sagðist vera á leið í aðgerð þar sem helmingur vinstra lunga hennar yrði fjarlægður.
Hún sagðist mjög vongóð um að krabbameinið hefði ekki dreift sér lengra þar sem það er aðeins á fyrsta stigi.
„Ég ætti að vera orðin hress og við fulla heilsu eftir um mánuð eða svo,“ skrifaði Griffin í færslu á samfélagsmiðlum. „Læknarnir eru mjög bjartsýnir þar sem þetta er á fyrsta stigi og bundið við vinstra lungað. Vonandi þarf ég ekki að fara í lyfja- og geislameðferð eftir þetta og ég ætti að fá fulla öndun aftur,“ skrifaði Griffin.