Streymisveita WarnerMedia, HBO Max, verður aðgengileg á Norðurlöndum nú í haust. Þetta kom fram á sjónvarpsráðstefnu í borginni Lille í Frakklandi. Streymisveitan er ein sú stærsta í heimi.
Í kjölfarið stefnir WarnerMedia á að gera streymisveituna aðgengilega víðar í Evrópu.
„Evrópa er okkar forgangsmál,“ sagði Priya Dogra, forstóri WarnerMedia í Evrópu, Miðausturlöndum, Afríku og Asíu. „Evrópa er flókinn en spennandi markaður.“
Þá sagði Dogra að lögð yrði áhersla á að bjóða upp á efni frá hverju landi fyrir sig.
Sem stendur hefur Stöð 2 sýningarréttinn að sjónvarpsefni frá HBO.