Leikkonan Gillian Anderson tók við sínum öðrum Emmy-verðlaunum á Emmy-verðlaunahátíðinni á dögunum. Verðlaununum fagnaði hún með stórri typpaköku frá teyminu hjá tískumerkinu Chloé sem klæddi hana fyrir verðlaunahátíðina.
Anderson hlaut verðlaunin fyrir túlkun sína á breska forsætisráðherranum Margaret Thatcher í fjórðu seríu The Crown. „Til hamingju með þann stóra,“ stóð á kökunni sem vísar líklega til þátta Anderson, Sex Education, en þriðja sería af þáttunum varð aðgengileg fyrir helgi.
Var þetta í sjötta sinn sem Anderson er tilnefnd til verðlaunanna en hún vann sín fyrstu verðlaun fyrir hlutverk sitt í X-Files árið 1997.