Friðrik, krónprins Danmerkur, mun leiða danska sendinefnd sem sækir Ísland heim 12. og 13. október. Tilefnið mun vera að kynna dönsk fyrirtæki og viðskiptalíf með áherslu á orkuskipti og sjálfbærar orkulausnir, að því er fram kemur í tilkynningu á vef dönsku konungsfjölskyldunnar.
Þar segir að Friðrik muni ásamt Guðna Th. Jóhannessyni, forseta Íslands, og Jeppe Kofod, utanríkisráðherra Danmerkur, meðal annars skoða Hellisheiðarvirkjun, varðskip í Reykjavíkurhöfn og funda í nýsköpunar- og atvinnuvegaráðuneytinu.
Fátt hefur verið um opinber ferðalög vegna kórónuveirufaraldursins og mun heimsóknin til Íslands vera fyrsta verkefni hans á erlendri grundu, þar sem mætt er í eigin persónu, frá því hann ásamt konu sinni, Mary krónprinsessu, fór til Frakklands árið 2019.
„Tilgangur viðskiptaferðanna er að efla tengsl milli Danmerkur og þeirra landa sem farið er til auk þess að styðja við vöxt danskra fyrirtækja og stöðu á erlendum mörkuðum,“ segir í tilkynningunni.