No Time To Die, nýjasta kvikmyndin um njósnarann James Bond, er söluhæsta Bond-mynd allra tíma, sé miðað við miðasölu kvikmyndahúsa fyrstu helgina eftir frumsýningu. Tekjur af myndinni nema nú þegar 25 milljónum punda, andvirði 4,3 milljarða króna.
Myndin var frumsýnd í Bretlandi og á Írlandi á fimmtudaginn var og eru tekjurnar af miðasölu þar þær mestu, miðað við fyrstu þrjá dagana, í 60 ára sögu Bond-myndanna.
No Time To Die er nú þegar orðin tekjuhæsta kvikmyndin í Bretlandi frá því að heimsfaraldurinn skall á snemma árs í fyrra, þrátt fyrir að hún hafi aðeins verið örfáa daga í sýningu. Þetta er sagt vera tilefni til bjartsýni fyrir iðnað kvikmyndahúsa um allan heim, sem legið hefur að mestu í dvala.
Nýja myndin hefur þegar verið frumsýnd í 54 löndum; Bretlandi, Írlandi, Þýskalandi, Spáni, Brasilíu, Japan o.fl. Samanlagt hefur myndin rakað inn alls 121 milljónum dollara, andvirði 15,4 milljarða króna.