Ástralska söngkonan Kylie Minogue ætlar að flytja aftur heim til Ástralíu eftir þrjátíu ára búsetu í Bretlandi. Minogue ræddi um flutningana í viðtali á BBC Radio 2.
Minogue sagðist þó alltaf myndu heimsækja Bretland reglulega eftir að hún flytur aftur til heimalandsins.
„Margir vina minna hafa hringt í mig, vinir mínir á veitingastað í hverfinu, og spurt mig hvað ég meini, ég geti ekki farið. Ég sagði þeim að ég væri í raun ekki að fara neitt. Ég hefði búið hérna í þrjátíu ár og ég myndi alltaf koma aftur,“ sagði hin 53 ára gamla söngkona.
Undanfarið árið hefur hún eytt miklum tíma í Ástralíu með fjölskyldu sinni. Minogue gaf nýlega út lagið A Second To Midnight í samstarfi við tónlistarmanninn Olly Alexander. Hún sagði að sig dreymdi um að fara á tónleikaferðalag á ný og að ferð um heiminn væri í pípunum.