Bandaríski stórleikarinn Harrison Ford týndi kreditkortinu sínu á dögunum í strandbæ nærri Palermo á Sikiley. Hann fékk það þó aftur í hendurnar í dag þökk sé þýskum ferðamanni.
Sá fann kreditkortið, merkt Harrison Ford, á fimmtudag og skilaði því inn til lögreglustöðvarinnar í strandbænum Mondello.
Lögregluþjónar þar höfðu svo uppi á leikaranum og skiluðu honum kortinu, að sögn lögreglu.
Ekki er ljóst samkvæmt tilkynningu hennar hvort Ford hafi þegar vitað að hann hefði týnt því.
Birt var mynd af leikaranum þar sem hann brosir og heldur kortinu á lofti ásamt lögregluþjónum á staðnum.