Lögráðamál tónlistarkonunnar Britney Spears verður tekið fyrir hjá dómara í Los Angeles í Bandaríkjunum í dag. Aðdáendur tónlistarkonunnar vonast til þess að Spears muni vera veitt sjálfræði sitt aftur á ný eftir tæp 14 ár undir stjórn föður síns. 

Faðir hennar, Jamie Spears, hefur farið fram á það við dómara að dóttir hans hljóti sjálfræði á ný. Mánuður er síðan Spears var rekinn sem lögráðamaður hennar, en Britney hefur sakað hann um að halda henni fanginni í öll þessi ár. 

Aðdáendur tónlistarkonunnar hafa komið saman í götunni við dómshúsið í Los Angeles og stefna að því að halda „frelsispartí“ ef dómari úrskurðar Spears í vil. 

Lögráðamannsmál tónlistarkonunnar hefur verið mikið í fjölmiðlum á þessu ári eftir að Britney bar í fyrsta skipti vitni fyrir dómara í júní síðastliðinn. Þar lýsti hún því hvernig faðir hennar hafi neytt hana til að vinna gegn hennar vilja og stjórnað persónulegu lífi hennar, þar á meðal setti hann hana á getnaðarvörn svo hún eignaðist ekki fleiri börn. 

Í kjölfar vitnisburðarins hefur fjöldi heimildamynda verið gefinn út um lögráðamannsmálið.

Sigur í júlí

Í júlí síðastliðinn gaf dómari tónlistarkonunni leyfi til þess að velja sér sinn eigin lögmann en fram að því hafði hún fengið lögmann skipaðan af dómara. Hún réði Mathew Rosengart lögmann til starfa og hefur hann barist fyrir hönd Britney í dómssalnum. 

Þá hefur hann einnig heitið því að rannsaka betur hvernig málum var háttað þegar faðir Britney var lögráðamaður hennar. Rosengart hefur meðal annars óskað eftir öllum gögnum um eftirlit sem haft var með söngkonunni í gegnum árin. 

The Guardian

BBC

Tengdar fréttir

Britney Spears

18 kílóum léttari eftir skilnaðinn við Spears

• Britney Spears opnar sig um einkalífið
• 16 ár síðan Spears krúnurakaði sig
• Faðir Britney glímir við alvarleg veikindi
• Lokar eftir aðeins örfáar vikur í sýningu

» Fleiri tengdar fréttir

• Blogga um frétt