Útför leikkonunnar Betty White verður haldin í kyrrþey að ósk hennar. Ástæðan er sú að hún vildi aldrei að fólk hefði mikið fyrir sér. Frá þessu greindi umboðsmaður hennar, Jeff Witjas.
Af þeim sökum er óljóst hvenær útförin fer fram og hverjir verða viðstaddir. White var ein ástsælasta leikkona Bandaríkjanna og féll frá á gamlársdag, 99 ára gömul. Hún lést af náttúrulegum orsökum.
Hún lést aðeins nokkrum dögum áður en hún hefði orðið 100 ára gömul, hinn 17. janúar.
„Jafnvel þótt Betty væri að verða hundrað ára hélt ég að hún myndi lifa að eilífu,“ sagði Witjas í tilkynningu.