Karl krýndur í maí
Karl III. Bretakonungur verður krýndur laugardaginn 6. maí á næsta ári. Krýningarathöfnin mun fara fram í Westminster Abbey en höllin sendi frá sér tilkynningu í gær.
Kamilla mun einnig verða krýnd drottning í sömu athöfn. Karl tók við völdum í Bretlandi hinn 8. september síðastliðinn þegar móðir hans, Elísabet II. Bretadrottning féll frá eftir 70 ár á valdastóli.
Krýningarathöfnin verður sú fyrsta í Bretlandi í 70 ár en móðir hans var krýnd 2. júní árið 1953. Hennar athöfn var einnig haldin á laugardegi, en var það í fyrsta sinn sem þjóðhöfðingi var krýndur á laugardegi síðan Játvarður VII. var krýndur árið 1902.
Óljóst er hvort Bretar muni græða einn almennan frídag fyrst athöfnin fer fram á laugardegi, en 1. maí er í vikunni áður og er það almennur frídagur þar í landi sem og víðar.
Höllin hefur gefið til kynna að nútímalegri bragur verði yfir athöfninni þó líka verði haldið í hefðirnar.
Karl verður elsti þjóðhöfðingi Bretlands til að verða krýndur, en hann verður orðinn 74 ára.
