Eggjum kastað að kónginum
Karlmaður hefur verið handtekinn í York á Bretlandi. Er hann grunaður um að hafa kastað eggjum í átt að Karli III. Bretakonungi og Kamillu drottningu er þau heimsóttu borgina í dag.
Konungshjónin heilsuðu upp á stjórnendur York í miðbænum og var fjöldi fólks mættur til að fylgjast með. Mannskarinn kallaði „GodSavetheKing“ en í kjölfarið var púað á konunginn. Skömmu seinna var eggjum kastað að Karli.
Alls virðist þremur eggjum hafa verið kastað í átt að hjónunum. Í mannskaranum mátti heyra mann kalla að landið hefði verið byggt á blóði þræla og að Karl væri ekki konungur hans. Aðrir virtust þó ekki á sömu skoðun og var kallað á móti að hann ætti að skammast sín.
Karl og Kamilla gerðu sér ferð til York í dag til að sjá styttu af móður Karls, Elísabetu II. Bretadrottningu, afhjúpaða. Styttan er sú fyrsta sem reist er eftir andlát hennar.
