Tilkynnt var í dag, á Degi íslenskrar tónlistar, hvaða hjómsveitir og tónlistarmenn eru tilnefnd til Kraumsverðlaunanna í ár, 21 talsins. Kraumsverðlaunin, árleg plötuverðlaun Auroru velgerðarsjóðs, verða afhent í fimmtánda sinn síðar í þessum mánuði fyrir þær íslensku hljómplötur er þykja skara fram úr hvað varðar gæði, metnað og frumleika. Dómnefnd verðlaunanna hefur nú valið þær plötur er hljóta tilnefningar til Kraumsverðlaunanna í ár og einnkennir tilnefningarnar í ár sá fjöldi listamanna sem kemur fram á sjónarsviðið með sínum fyrstu breiðskífum, eins og segir í tilkynningu. „Einnig er sú mikla gróska er ríkir í rafskotinni popp-, pönk- og danstónlist áberandi í tilnefningum ársins. Annars ræður fjölbreytnin ríkjum og listinn inniheldur verk af ýmsum toga, m.a. popp og þungarokk, fönk og reggí, jazz og house, tónverka- og tilraunatónlist,“ segir þar.
Kraumsverðlaunum er ætlað að kynna og styðja við plötuútgáfu íslenskra listamanna og hljómsveita. Verðlaunin eru ekki bundin ákveðinni tónlistarstefnu og þeim fylgja engir undirflokkar. Alls hafa hátt í áttatíu listamenn og hljómsveitir hlotið Kraumsverðlaunin fyrir plötur sínar, flestir snemma á ferlinum, frá því verðlaunin voru fyrst veitt árið 2008. Það er Aurora velgerðarsjóður sem stendur að Kraumsverðlaununum. Tilnefningar eru eftirfarandi:
Alfreð Drexler - Drexler’s Lab
Ari Árelíus - Hiatus Terræ
Ástþór Örn - A machine that runs on blood
Final Boss Type ZERO - 1000 Cuts
Fríða Dís Guðmundsdóttir - Lipstic On
Guðir hins nýja tíma - Ég er ekki pervert, ég er spæjari
gugusar - 12:48
Kraftgalli – Kúlomb
Kruklið - SAMHERJI: The musical
KUSK - Skvaldur
Kvelja - Andþrot
Kvikindi - Ungfrú Ísland
Lilja María Ásmundsdóttir & Ines Zinho - Internal Human
Oh Mama - Hamraborg
Óskar Kjartansson - Gork
Ronja - 00000
Siggi Olafsson (Berglind Ágústsdóttir) - Lost at war
Skurken - Dagur
Stirnir - Beautiful Summer, Big Stjarna
Ultraflex - Infinite Wellness
Una Torfa – Flækt og týnd og einmana