Opin minningarathöfn til heiðurs Lisu Marie Presley fór fram í Graceland um helgina. Sarah Ferguson minntist vinkonu sinnar á sunnudaginn og vitnaði hún í fyrrverandi tengdamóður sína, Elísabetu Bretadrottningu, sem lést í fyrra.
„Tengdamóðir mín heitin sagði að það væri ekki hægt að segja neitt sem linar þjáningar og sársauka í þessum aðstæðum af því að sorg væri gjaldið sem við greiddum fyrir ástina,“ sagði Ferguson í ræðunni og benti á að drottningin hafði haft rétt fyrir sér.
Elísabet lét þessi orð falla þegar hún sendi New York-búum skilaboð eftir að tvíburaturnarnir féllu árið 2001 að því fram kemur á vef Page Six.
Ferguson talaði til dætra Presley en hún á 33 ára dóttur og 14 ára tvíbura. Hún átti einnig son sem lést eftir sjálfsvíg fyrir tæpum þremur árum. Sagði hún fólk styðja við bakið á börnum Presley.