Leikkonan Maggie Wheeler, sem eftirminnilega fór með hlutverk Janice í þáttunum Friends, segir bæði sorglegt og erfitt að lesa æviminningabók mótleikara síns úr Friends, Matthews Perrys. Wheeler og Perry léku um tíma par á skjánum og segir hún bókina útskýra margt í fari hans á þeim tíma sem þættirnir voru teknir upp.
Í bókinni Friends, Lovers and the Big Terrible Thing segir Perry frá því að honum var vart hugað líf fyrir nokkrum árum þegar ristillinn sprakk eftir ofneyslu ópíóða. Þá var hann í dái í tvær vikur og fimm mánuði á spítala.
„Mér finnst hann hafa staðið sig ótrúlega vel og hafa lifað alvöruhremmingar af,“ sagði Wheeler í viðtali við Page Six. „Ég er svo stolt af honum og svo glöð að hann skuli vera kominn á þennan stað. Mér finnst hann sýna mikið hugrekki að skrifa þessa bók og tala um þetta allt. Það hefur án efa hjálpað mörgum,“ sagði Wheeler.
„Hann kom í vinnuna jafnvel þótt hann væri á dimmum stað, hann mætti í vinnuna með allan sinn húmor og hæfileika. Ég upplifiði aldrei að hann væri óöruggur með sjálfan sig, hann var alltaf 100%, jafnvel þótt hann ætti erfitt,“ sagði Wheeler.