Segir breytingarnar á kostnað kvenna

Söngkonan Shaznay Lewis segir ekki réttlátt að konur þurfi að líða fyrir þær breytingar sem gerðar voru á flokkum á Brit-verðlaunahátíðinni. Nú eru ekki lengur kynjaðir flokkar og þannig aðeins listamaður ársins, valinn í stað söngvar og söngkonu. Þannig væri hægt að opna flokkana fyrir þau sem skilgreina sig utan kynjatvíhyggjunnar.

Í ár eru hins vegar aðeins karlmenn tilnefndir í flokknum.

Lewis, sem unnið hefur til tveggja Brit-verðlauna með stúlknasveit sinni All Saints, segir hugmyndina á bakvið breytinguna góða en að framsæknar hugmyndir ættu að hagnast öllum.

Frétt af mbl.is

Kyngreindir flokkar heyra sögunni til

„Hvernig getum við gert það, ef staðreyndin er að við viðurkennum ekki listakonur, sem eru táknmynd valdeflingar fyrir milljónir ungra kvenna um allan heim?“ skrifar Lewis í pistli á Radio Times.

„Ef Brit-verðlaunin eiga að vera fyrir öll, hvernig getum við haldið áfram með þennan flokk sem í ár nær ekki til hemings listamanna, kvenna? Ég vona að þetta verði ekki svona árið 2024.“

Adele var fyrst til að vinna verðlaunin í flokknum eftir að þeim var breytt. Í sigurræðu sinni sagðist hún skilja breytingarnar. „En ég elska að vera kona og að vera listakona. Ég er rosalega stolt af okkur,“ bætti Adele við.

Í ár eru Fred Again, Central Cee, George Ezra, Stormzy og Harry Styles tilnefndir sem listamenn ársins. Listakonur á borð við Charli XCX og Florence + The Machine misstu af tilnefningu en Wet Leg, Nova Twins og Cat Burns eru tilnefndar í öðrum flokkum.

„Konur, eins og var fyrirsjáanlegt, hafa þurft að líða fyrir þessa breytingu. Þetta er ekki rétt,“ skrifaði Lewis.

• Blogga um frétt