Á ári hverju fá útvaldar stjörnur og frumkvöðlar frá hinum ýmsu sviðum boð á tískuviðburð ársins, Met Gala-hátíðina sem haldin er á vegum tískutímaritsins Vogue.
Í ársbyrjun var þema viðburðarins tilkynnt en nú bíða tískuunnendur óþreyjufullir eftir að sjá skærustu stjörnurnar ganga rauða dregilinn í klæðnaði frá fremstu tískuhúsum heims.
Heimildir Page Six herma að Anna Wintour, ritstjóri Vogue, ætli að fækka nöfnum á gestalistanum í ár og að engin af Kardashian-Jenner systrunum muni vera á listanum. Vogue vildi ekki tjá sig um gestalista viðburðarins.
Á síðasta ári fengu allar systurnar, þær Kourtney, Kim og Khloé Kardashian, og Kendall og Kylie Jenner, boð á viðburðinn. Var það í fyrsta sinn sem þær voru allar samankomnar á hátíðinni.
Kim sótti viðburðinn í fyrsta sinn árið 2013 með þáverandi eiginmanni sínum, Kanye West.
Síðan þá hefur hún verið tíður gestur á viðburðinum og verið þekkt fyrir djörf dress frá hönnuðum á borð við Givenchy, Lanvin, Roberto Cavalli, Balmain, Vivienne Westwood, Versace og Balenciaga.
Kendall mætti í fyrsta sinn á viðburðinn árið 2014 og Kylie árið 2016. Þá léku Khloé og Kourtney frumraun sína á Met Gala-hátíðinni á síðasta ári.