Körfuboltagoðsögn á batavegi eftir aðgerð

Mörgum brá heldur betur í brún þegar NBA-leikmaðurinn fyrrverandi Shaquille O'Neal birti mynd af sér inn á Twitter. Á henni liggur hann í sjúkrarúmi, klæddur sjúkrahúskjól og tengdur við línurit.

Eftir að hafa valdið aðdáendum sínum miklum áhyggjum og ruglingi útskýrði O'Neal ástæðuna fyrir spítalainnlögninni og var mörgum ansi létt þegar hann sagðist vera á batavegi eftir mjaðmaskiptaaðgerð.

Shaquille O'Neal á batavegi eftir aðgerð. Skjáskot/Twitter

„Til þeirra sem hafa áhyggjur. Ég vil byrja á því að segja takk,“ sagði O'Neal í færslu á Instagram. 

„Og að lokum vil ég segja að það er allt í lagi með mig. Ég þurfti bara að komast í smá „BBL“ sem ég kýs að kalla #hipreplacement. En já, ég er í lagi, það þarf ekki að hafa áhyggjur af mér.“

Grínaðist með rasslyftingu

Körfuboltagoðsögnin nýtti sér tækifærið og gantaðist í fylgjendum sínum á samfélagsmiðlum og sagðist hafa þurft á smá rasslyftingu að halda og því skellt sér í „brazilian–buttlift.“

O'Neal er velþekktur fyrir að fíflast góðlátlega í aðdáendum sínum og því ekki úr karakter fyrir hann að nýta tækifærið á meðan hann jafnar sig. 

• Blogga um frétt