Fyrsta þáttaröð nýs framleiðslufyrirtækis, Act 4, mun fjalla um afleiðingar mannskæðs eldgoss á Íslandi. Þáttaröðin er samstarfsverkefni íslenska framleiðslufyrirtækisins Act 4, hins bandaríska Upgrade Productions og króatíska Drugi Plan.
Ólafur Darri Ólafsson leikari og Hörður Rúnarsson eru í forsvari fyrir Act ásamt þeim Jónasi Margeiri Ingólfssyni og Birki Blæ Ingólfssyni.
Variety greinir frá og segir að um átta þátta þáttaröð sé að ræða. Þættirnir bera titilinn Volcano og er hugarfóstur þeirra Nebojsa Taraba og Miodrag Sila. Hörður skrifar handritið ásamt Meteja Bozicevic.
Þættirnir verða teknir upp á Íslandi og í Króatíu en stefnt er að framleiðsla á þeim hefjist snemma á næsta ári.
Í þáttunum verður skoðað hvað gerist þegar Ísland verður óbyggilegt eftir mannskætt eldgos. Verða Íslendingar fluttir til Króatíu og fylgst með því hvernig þeir fóta sig í nýju landi.