Breski stórleikarinn Michael Caine fagnaði níræðisafmæli sínu með góðum vinum í Lundúnum í síðustu viku. Forsetahjónin fyrrverandi Ólafur Ragnar Grímsson og Dorrit Moussaieff voru í gleðskapnum sem og Hollywood-stjarnan Tom Cruise.
Dorrit hefur birt nokkrar myndir úr veislunni á samfélagsmiðlum og má meðal annars sjá Ólaf Ragnar og Cruise í góðum gír. Hún birti einnig mynd af sér með þeim Caine og Cruise.
Caine og forsetahjónin fyrrverandi hafa verið góðir vinir í mörg ár. Árið 2004 voru Ólafur Ragnar og Dorrit viðstödd boð til heiðurs Cane í New York og fjallaði New York Times um boðið.
„Í New York Times segir um Ólaf Ragnar að hann sé glaðlegur maður. Hann og Caine hafi kynnst fyrir nokkrum árum, um það leyti sem Ólafur Ragnar og Dorrit Moussaieff kynntust, en Dorrit og Shakira, eiginkona Caine eru góðar vinkonur,“ kom fram á mbl.is eftir samkvæmið fyrir tæpum 20 árum.
Caine varð níræður þann 14. mars og fór veislan ekki fram hjá breskum slúðurmiðlum. Á vef Daily Mail kemur fram að í veislunni hafi einnig verið Íslandsvinurinn David Walliams sem sló meðal annars í gegn í þáttunum Little Britain.
Níræðisafmælið fór fram á veitingastaðnum The River Café í Lundúnum. Ferðavefur mbl.is hefur fjallað um veitingastaðinn sem er með Michelin-stjörnu og er í uppáhaldi hjá ríka og fræga fólkinu.