Tók fyrstu skrefin eftir að hafa brotið fleiri en 30 bein

Bandaríski leikarinn Jeremy Renner hefur stigið sín fyrstu skref á göngubretti eftir að hann lenti í alvarlegu slysi á nýársdag þar sem hann braut fleiri en 30 bein. 

Renner slasaðist alvarlega þegar snjóruðningstæki fór yfir hann fyrir utan heimili leikarans í Nevada-ríki. Í kjölfar slyssins var Renner lagður inn á gjörgæslu og gekkst undir tvær aðgerðir. Hann varði rúmum tveimur vikum á sjúkrahúsi eftir slysið. 

Frétt af mbl.is

Braut fleiri en 30 bein í slysinu

Í myndskeiði sem leikarinn tísti sést hann ganga á sérstöku göngubretti sem vinnur gegn þyngdaraflinu og gerir það að verkum að hann finnur aðeins fyrir um 40% af þyngd sinni í hverju skrefi.

„Núna verð ég að finna eitthvað annað til að eyða tíma mínum í svo líkaminn minn geti jafnað sig,“ skrifaði leikarinn við myndskeiðið. Sérfræðingar telja að endurhæfing Renner taki marga mánuði.

Áfallastreituröskunin sé stærsta áskorunin

„Við segjum oft við einstaklinga sem hefur lifað af alvarleg slys og eru á gjörgæslu að þeir muni endurheimta 90% af getu sinni um 12 til 18 mánuðum eftir að þeir yfirgefa sjúkrahúsið,“ sagði Ron Daniels, læknir á gjörgæslu í Bretlandi, í samtali við Daily Mail. 

Hann bætir við að Renner muni þjást bæði andlega og líkamlega og muni þurfa á stuðningi og endurhæfingu að halda í marga mánuði eftir slysið. „Ég held að stærsta áskorunin verði áfallastreituröskunin sem þetta mun án efa hafa í för með sér,“ bætti Daniels við.

• 1 blogg um fréttina

Bloggað um fréttina

• Ómar Ragnarsson: Evel Knievel lifði af á fjórða hundrað beinbrot.