Leikarinn Bryan Cranston hefur heitið konunni sinni, Robin Dearden, að hætta að leika árið 2026 svo hann geti varið meiri tíma með henni. Segir hann að hún hafi lifað lífi sínu síðustu 24 árin í skugganum af honum og þurft að haga lífi sínu út frá hans lífi. Nú sé kominn tími til þess að jafna þetta út.
Cranston opnar sig um þessar fyrirætlanir fyrir næstu þrjú árin í viðtali við breska tímaritið GQ. Segir hann frá því að þau hjónin hafi verið í pararáðgjöf síðan áður en þau giftu sig. Cranston segist elska konu sína heitt og vilji leggja sitt af mörkum til að viðhalda heilbrigðu sambandi. Hingað til hafi hún alltaf verið þessi plús einn, eiginkona frægrar manneskju, og vill Cranston binda endi á það.