Heiðra Eurovision-farann Käärijä með stórri veggmynd
Käärijä vann hug og hjörtu Evrópubúa með lagi sínu Cha Cha Cha í Eurovision-keppninni í maí síðastliðnum.
AFP/Oli Scarff
Setja bókamerki
Borgaryfirvöld í finnsku borginni Vantaa ætlar að heiðra Eurovision-farann Käärijä með stórri veggmynd. Verður henni komið fyrir á vegg matvöruverslunar í Tikkurila-hverfinu og koma fjórar veggmyndir til greina. Almenningur fær tækifæri til að velja sér sína uppáhalds veggmynd og mun Käärijä sjálfur velja á milli þeirra tveggja sem fá flest atkvæði.
Samkvæmt finnska ríkissjónvarpinu verður vinningsmyndin tilkynnt í næstu viku og farið verður í framkvæmdir eins fljótt og auðið er. Hægt er að sjá myndirnar sem koma til greina hér.
Käärijä vann hug og hjörtu Evrópubúa í Eurovison-keppninni í maí síðastliðnum, þar sem hann vann símakosninguna en endaði samanlagt í öðru sæti. Náði hann næstbesta árangri Finnlands í sögu keppninnar.
