Kutcher stígur til hliðar sem formaður
Setja bókamerki
Bandaríski leikarinn og athafnamaðurinn Ashton Kutcher hefur ákveðið að stíga til hliðar sem formaður Thorn, samtaka sem vinna gegn kynferðisofbeldi og mansali. Ákvörðunin kemur í kjölfar bréfs sem Kutcher ritaði ásamt eiginkonu sinni Milu Kunis til stuðnings Danny Masterson meðan á réttarhöldum yfir honum stóð.
Kutcher, sem stofnaði Thorn árið 2009 ásamt þáverandi eiginkonu sinni Demi Moore, birti bréf á heimasíðu samtakanna á föstudag þar sem hann útskýrði ákvörðun sína, en Kunis sem starfar einnig fyrir samtökin hefur sömuleiðis ákveðið að stíga til hliðar.
„Ég get ekki leyft dómgreindarleysi mínu að afvegaleiða okkur og allt sem við höfum unnið að,“ skrifaði Kutcher meðal annars.
Kutcher og Kunis birtu einnig sameiginlega afsökunarbeiðni á Instagram nýverið.
