Íþróttaálfurinn slær í gegn á TikTok

Flestir kannast eflaust við hina geysivinsælu þætti um Íþróttaálfinn og vini hans í Latabæ enda hafa þeir notið mikilla vinsælda um allan heim. Nú hefur Íþróttaálfurinn, sem leikinn er af Magnúsi Scheving, tekið yfir TikTok.

Að undanförnu hafa TikTok-myndskeið með yfirskriftinni „Sportacus challange“ eða „Íþróttaálfa-áskorun“ vakið mikla athygli á miðlinum. 

Í myndskeiðunum keppast notendur við að leika eftir Íþróttaálfinum og reyna við ýmsar æfingar úr þáttunum vinsælu, allt frá krefjandi armbeygjum yfir í handstöður og heljarstökk. Það er óhætt að segja að margar af æfingunum henti betur fyrir lengra komna. 

Margir ólust upp með Íþróttaálfinn á sjónvarpsskjánum og dást nú að styrk og snerpu hans í ummælum myndskeiðanna, en sumir hafa viðurkennt að hafa alls ekki áttað sig á hve flóknar og erfiðar æfingar Íþróttaálfurinn væri að gera og eru nú agndofa yfir honum.

• Blogga um frétt