Endurvekja einn langlífasta skemmtistað borgarinnar

Einn langlífasti skemmtistaðurinn í Reykjavík, 22, verður opnaður á ný við Laugaveg 22 þar sem hann verður samrekinn hinsegin skemmtistaðnum Kiki.

Frá þessu er greint í tilkynningu skemmtistaðarins á Facebook.

Skemmtistaðurinn 22 var stofnaður árið 1988 og rekinn til ársins 2006. Gegndi hann hlutverki samkomustaðar samkynhneigðra og hinsegin fólks í miðborginni.

Í tilkynningunni segir að saga hinsegin fólks í húsinu eigi sér þó enn lengri formála „og tengist hornið hinsegin samfélaginu sterkum böndum“.

Frétt af mbl.is

Hringja í gamla „bólfélaga“ og opna Kiki á ný

Sögunni gert hátt undir höfði

Eigendaskipti urðu á Kiki í júlí en þá tók Magnea Fredriksen við sem rekstrarstjóri og Margrét Erla Maack sem skemmtanastjóri. Rekstur 22 mun vera í höndum þeirra tveggja.

„[N]ú hefur einn langlífasti staðurinn á þessu horni, hinn margrómaði skemmtistaður KIKI Queer Club stækkað við sig, og tekið yfir neðri hæð hússins undir nýjum merkjum 22,“ segir í tilkynningunni.

„Verður sögu hússins og því lífi sem hann hefur hýst gert hátt til höfuðs, ásamt því að tvinna saman viðburðarhald milli hæðanna og styrkja félagslíf hinsegin samfélagsins.“

• Blogga um frétt