Bragi Valdimar sendir andlausum skransölum tóninn

Bragi Valdimar Skúlason hugmyndavél hjá auglýsingastofunni Brandenburg og hljómsveitarmeðlimur í Baggalúti er ekki ánægður með „singles day“ sem er í dag. Dagurinn snýst um að einhleypir geti gert góð kaup.

Í færslu á Facebook-síðu sinni sendir Bragi Valdimar andlausum og óinnblásnum kaupahéðnum og skransölum tóninn.

„Ágætu andlausu, óinnblásnu kaupahéðnar og enskuupplepjandi skransalar. Hér fáið þið fáeinar tillögur að íslenskum heitum á þennan eymingjans ellefta nóvember, dag einhleypra, sem þið kjósið raunar ítrekað og umhugsunarlaust að kalla „singles day“ – og já – sem þið megið gjarnan að óbreyttu troða þéttingsfast upp í greiðslugáttirnar á ykkur,“ segir Bragi Valdimar og kemur með nokkrar tillögur hvað þessi dagur gæti heitið:

• Eindagi
• Stakdægur
• Einidagur
• Dagur einmanaleikans
• Einsemdadægur
• Ógiftudagur
• Kaupársdagur
• Einkaupadagur
• Álausudagur
• Einverudagur
• Staklingamessa
• Dagur hinna einstæðu
• Ókvænisdagur
• Einsa–mall
• Dagurinn eini
• Einverjadagur
• Dagur einstæðinga
• Einhleypidagur
• Lausliðugramessa
• Einkaupadagur
• Skrandagur
• 1111