Íslendingur á eitt besta listaverk 21. aldar

„Ef ég væri beðinn að nefna fimm bestu listaverk 21. aldar, þá þyrfti ég nokkra daga til þess að fylla þrjú neðstu sætin. En ég ætti ekki í neinum vanda með að nefna fyrsta og annað sætið sem eru vídeólistaverkin „The Clock“ eftir Christian Marclay og „The Visitors“ eftir Ragnar Kjartansson (ekki endilega í þessari röð),“ segir Smee í nýlegri rýni sinni í The Washington Post en hann hlaut Pulitzer-verðlaun fyrir listrýni árið 2011.

„Þið hafið kannski eða kannski ekki heyrt um þessi verk en ég er ekki að fara út á hálan ís með þessari fullyrðingu,“ segir Smee sem heldur því fram að verk Ragnars sé eina verkið sem hann veit um sem framkallar bæði aðdáun og sælutilfinningar hjá öllum sem sjá það, hvort sem þeir eru með bakgrunn í listum eða ekki.

Um verk Marclays segist Smee ekki vita um neinn sem ekki dreymir um að horfa á það í heilan dag en um er að ræða sólarhringslangt verk á einni rás með hljóði og er samansafn myndbrota úr sjónvarpi og kvikmyndum.

Verkið hefur almennt hlotið mikið lof gagnrýnenda og hlaut til dæmis Gullna ljónið á Feneyjatvíæringnum árið 2011.