„Þarna inni mun fólk upplifa þrennt“

Tónlistartvíeykið VÆB, sem skipað er þeim Hálfdáni Helga og Matthíasi Davíð Matthíassyni, hefur opnað sérstaka verslun í Kringlunni í tilefni þátttöku þeirra fyrir Íslands hönd í Eurovision. Verslunin opnaði formlega á miðvikudaginn og verður opin um helgina, laugardag og sunnudag, frá klukkan 12 til 16.

Í versluninni má finna fjölbreyttan varning tengdan sveitinni, þar á meðal vinsælu VÆB-gallana sem notið hafa mikilla vinsælda meðal ungs fólks, auk húfa, derhúfa og fleiri muna í sama stíl. Bræðurnir segjast spenntir fyrir viðtökunum.

„Þarna inni mun fólk upplifa þrennt: virðingu, æðruleysi og bullandi stemmningu. There you go,“ segja þeir léttir.

VÆB stígur á stóra svið Eurovision í Basel, Sviss, næstkomandi þriðjudagskvöld, þar sem Ísland keppir fyrst allra atriða í undanúrslitum keppninnar. Blaðamenn mbl.is verða á staðnum og koma til með að fylgjast grannt með undirbúningi og framgöngu íslenska hópsins.

Það var mikil stemning þegar verslunin var opnuð á miðvikudaginn. Ljósmynd/Aðsend

• Blogga um frétt